O Secretario Xeral do P.G., Manoel Soto, e o Vicesecretario Francisco López “Chesqui” oficializaron, xunto a Antonio Moure e Carlos Peleteiro a constitución da Xestora do Partido Galeguista en A Pobra; nun acto no que tódolos comparecentes salientaron a vocación da alternativa Galeguista de outorgar a máxima confianza e capacidade executiva as Xuntas Municipais e os propios representantes Galeguistas nos distintos concellos Galegos. A Galicia dos Concellos e das Comarcas constrúese desde a descentralización e a seguridade de que a suma dos proxectos municipais e comarcais afortala a alternativa común que o Galeguismo ten deseñado para a Galicia e para o propio conxunto do Estado e da Europa.
A política de proximidade ó cidadán, materializada no respecto e compromiso cos intereses dos veciños e na capacidade de xestionalos a nivel dos Concellos con absoluta independencia, o diálogo e o entendemento son aspectos claves para normaliza-la vida política nos Concellos Galegos.
O P.G. é unha forza política de referencia, polos 75 anos de historia e traxectoria e por contar cun proxecto de País firme e consolidado no que teñen cabida tódolos que queiran comprometerse en serio con Galicia. Unha casa común aberta e cordial desde a que os Galeguistas estamos a preparar a comparecencia do P.G., como formación política diferenciada e diferencial, nas vindeiras eleccións municipais.
A Xestora Galeguista de A Pobra ten previstas varias xuntanzas con afiliados e simpatizantes Galeguistas para constituír nos próximas días a Xunta Local e deseñar o plan de traballo cara as municipais.
