Co fondo sentimento que provoca a súa perda, dar conta do pasamento do irmán e mestre Antón Moreda Rodríguez, medalla de ouro do Partido Galeguista quen xa pertence para sempre a memoria coleitiva do movimento Galeguista e do P.G.
Antón Moreda Rodríguez (nado en San Miguel de Reinante – Lugo, no ano 1.934) foi un dos fundadores das Mocidades Galeguistas de Bós Aires (ano 1.953), das que foi Secretario Xeral e participou no I Congreso da Emigración Galega; participou no mítico colectivo Brais Pinto, no que mantén unha estreita relación con Raimundo Patiño e Méndez Ferrín, e foi un dos fundadores Presidente do Consello da Mocidade (1.963). A Executiva Nacional acordou por unanimidade concederlle a máxima distinción partidaria, o emblema histórico en ouro do P.G., polo seu compromiso e activismo político na defensa das liberdades da Galiza e do ideario Galeguista.
A figura sobranceira deste Galeguista xongue nunha mesma expresión o Galeguismo Histórico e o Contemporáneo; para esta xeración, orgulosa de militar nun partido como o noso que está a construír o Galeguismo do século XXI, a súa exemplar traxectoria é un referente de valor incalculable tanto pola súa enerxía vital como pola humildade da que soubo facer un exemplo de grandeza. Nós, os Galeguistas, eliximos en quen deposita-la nosa devoción e o noso respecto, o irman Antón Moreda ten e terá sempre un lugar nesta historia que ninguén vai a escribir por nós porque, a través do Partido Galeguista, pertence o pobo Galego e a esa Galiza verdadeira e nobre que transcende a calquera xeración e a calquera tempo.
As honras fúnebres, que terán lugar mañán xoves, día 4 de Febreiro, en San Cosme de Barreiros, asistirá Francisco López “Chesqui”, na súa condición de Coordinador Xeral do Partido Galeguista e por delegación expresa do Presidente do Partido Galeguista, Xesús Manuel Suárez, así como integrantes da Executiva Nacional do P.G. Como homenaxe póstumo, serán portadores da Bandeira Histórica de Galiza (entregada polos Galeguistas de México fai perto de trinta anos a Dirección lexítima do Partido Galeguista) coa que se cobreu o cadaleito de Galeguistas ilustres como D. Ramón Martínez López e Manolo Beiras, entre outros, para renderlle as honras Galeguistas das que é merecente o xa inmortal Antón Moreda.
Irmán Antón, Sempre por Galiza, Sempre Galeguistas.
