A Xunta Local do PG da Estrada, expresa a súa dor pola morte do histórico dirixente galeguista  Antón Moreda, elo básico na reorganización do movemento nacional galego despois de que o golpe fascista de 1936 tronzase a traxectoria do Partido Galeguista de Castelao e Bóveda.

Natural de San Miguel de Reinante, concello de Barreiros, Moreda naceu en 1934. Fillo e neto de emigrantes, embarca en 1950 con só 16 anos para Arxentina, entrando en contacto no Centro Galego de Bos Aires cos núcleos galeguistas que, articulados ao redor da Irmandade Galega, trataban de preservar a obra e o pensamento de Castelao. En agosto de 1953 participa na fundación das Mocedades Galeguistas de Arxentina.

De volta en Galiza á altura de 1960, entra a traballar como axente comercial da Editorial Galaxia, aproveitando esta actividade para contactar con novos galeguistas organizados arredor das asociacións culturais.

Pola súa militancia anterior contaba cunha experiencia organizativa da que se carecía no país por mor do franquismo. A frustración do proxecto do Consello da Mocedade, frustrou as ilusións do seu promotor, mais non o seu perenne compromiso con Galiza nin tampouco o obxectivo principal dos seus anceios: a organización política do sentimento galeguista.

Descanse en paz.

A Estrada recibe unha das peores noticias relacionadas co urbanismo local: O Tribunal Superior de Xustiza de Galicia anula as normas transitorias ditadas pola Xunta en materia de urbanismo.

Desde a agrupación local do Partido Galeguista, alertamos da situación que se podería producir no suposto caso de que a nosa vila tivese que volver ás normas urbanísticas de 1978, unhas normas que non permiten o desenvolvemento ordenado de todo o Concello estradense, sen entrar a valorar as responsabilidades políticas que se poderían acadar

Todos os veciños da Estrada temos a responsabilidade de ser coherentes en relación á redacción dun novo PXOM, sendo prudentes á hora de manifestar a nosa postura de cara á sociedade estradense, e en canto aos políticos que actualmente teñen a encomenda de gobernar, aínda cabe pedirles máis responsabilidade. Cómpre un pacto de gran altura de todos os partidos políticos para lograr a aprobación do documento, ao goberno local pedímoslle transparencia e humildade, á oposición suxerímoslle que deixe de criticar por sistema para obter réditos políticos.

A nosa vila sofre un atraso importante en materia de vias de comunicación, de solo industrial ou de humanización entre outras, sen esquecernos dun dos problemas fundamentais do noso rural como é o saneamento.

Desde o PG, seguiremos traballando para que a nosa sociedademellore, intentando dignificar cada día máis a actividade política.