O PARTIDO GALEGUISTA HOXE

construindo o Galeguismo do século XXI

Posiblemente non teña habido outro caso na historia na que unha opción política leve sufrido tantas agresións e tentativas de espolio como o Partido Galeguista, especialmente nos últimos trinta anos. Recurrindo a unha memoria histórica acomodada a intereses alleos, que é amnésica con aquelo que non convén lembrar, do Galeguismo lévase tentado manipular todo: a súa terminoloxía sociocultural e política, os seus mártires e represaliados, ós seus persoeiros, e incluso a súa propia liña política e historiografía. O método e a teima sempre foi trocar a incómoda forza do substantivo “Galeguista” por un cómodo e adaptable adxectivo que, empregando a mesma palabra, permitira a súa instrumentalización por tódolos que, marxinando a un segundo plano ou esquecendo as ideas e a ética do Galeguismo, buscaron e buscan os beneficios da estética mediática que lles da empregar o xentilicio “galeguista”.

Pero non, o substantivo "Galeguista" é algo que ten forza real, independente e individual, algo importante, fundamental e esencial; mentres que o adxectivo "galeguista" (coa minúscula inicial que levan tódolos adxectivos) non pasa de ser algo secundario, non esencial e accidental. Esa definición académica é, xustamente, o que nos diferencia e distingue aqueles que, empregando o termo “Galeguista” como o substantivo que ten forza real e independente, militamos no Partido Galeguista.  

Nós somos un partido histórico, pero non porque nos limitemos a mirar cara atrás ou para tempos mellores; sómolo porque estamos afincados como seña de identidade sustantiva na milenaria Identidade Galega e na historia de Galicia e, tamén, porque  mantemos o compromiso de traballar arreo para cambea-la historia da nosa Nación.

Hoxe os Galeguistas  prantexamonos o reto de construir o Galeguismo do século XXI,  coa vocación e o obxectivo permanente de conformarnos como a forza sociopolítica que  interprete axeitadamente as inquedanzas cidadans, que constrúa solucions tan imaxinativas como eficaces  para darlles resposta e que, facendo honra da nosa case centenaria historia, sexa capaz de deseñar as liñas de traballo novidosas  que Galiza necesita para a súa emancipación.    

Xa que logo, o Partido Galeguista é unha organización política de mulleres e homes que teñen por obxectivo erguer a Galicia ata situala en pé de igualdade cos pobos europeos máis desenvolvidos.

Nós, os Galeguistas, entendemos que Galicia, como nación histórica europea e tamén como expresión sociopolítica da irmandade universal que conformamos os galegos espallados polo mundo, demanda unha renovación da teoría e da praxe política que redeseñe os puntos referenciais de calquera acción que interprete, administre ou reivindique os seus dereitos lexítimos como nacion participativa, soberán e diferenciada tanto da Unidade Europea como do Estado de Dereito definido pola Constitución do 78, baixo a denominación xenérica de España, que implicitamente recoñece e debe de protexer os diferenciais da nosa IDENTIDADE como pobo, da nosa cultura e tradicións, do noso idioma e das institucións que representan e expresan, sociopolítica e administrativamente, tanto os intereses como os lexítimos e históricos dereitos dos cidadáns galegos e, por extrapolación, do concepto  nacional que reside no pobo galego e debe de expresarse polo medio dos seus órganos  constitucionais representativos.

O noso VIII Congreso supón un punto de inflexión na conquista, o mais axiña posible, dos devanditos obxectivos. Defenderémo-los intereses das galegas e  galegos en tódolos ámbitos de actuación convenientes, mediante a elaboración e a execución de estudios, programas, e demais traballos que posibiliten a conquista dos maiores niveis de desenvolvemento económico, social, e cultural, das xentes dos lugares, parroquias, aldeas, vilas e cidades tanto dos que residan dentro dos territorios históricos da Galicia como daqueles  que estén en outros países ou estados da península Ibérica, Europa, América e o resto do mundo.

Queremos que a mensaxe  galeguista chegue ós cidadáns do único xeito xenuíno que ten de manifestarse: a través do Partido Galeguista; e para iso traballaremos sen desmaio e executarémo-las formas de actuación política máis idóneas e axeitadas, principiando pola loita para acada-las cotas de autogoberno que precisámo-los galegos para podérmonos desenvolver como pobo diferenciado que somos, cousa que compatibilizaremos cun traballo concertado e solidario co resto dos pobos. Somos e seremos, cada vez mais, a opción política capaz de garantir a máxima capacidade operativa e decisoria para o goberno galego, sen caer en sinerxías excluíntes nin illacionistas; unha opción, en definitiva, que sexa capaz de interpretar axeitadamente o concepto da IDENTIDADE GALEGA e, como consecuencia inmediata, ter unha visión estadista da política, tanto a nivel de Estado como da Unidade Europea e internacional. O que está claro é que, para construír a Galicia que queremos, temos que participar decidida e comprometidamente no redeseño da contorna  administrativa e política que está agora vixente; sempre desde perspectivas nas que a irrenunciable e decidida defensa dos nosos dereitos históricos sexan unha garantía de solidariedade e traballo en común con outros pobos e territorios cos que temos moitos séculos de historia compartida. 

Xa que logo, declarámo-la nosa vontade de participar e colaborar nas actividades políticas galegas, do Estado Español e de Europa, pra axudar á mellor gobernación posíbel de Galicia, das Españas e da Comunidade Europea, no marco do Estatuto de Nacion Histórica de Galicia e dos marcos  Constitucionais que, tanto no presente coma no futuro, conten co respaldo democrático dos cidadáns e dos poderes galegos, como normas básicas que garanten o noso dereito ó autogoberno, cousa esta que constitúe unha xustificación senlleira pra razón de ser do Partido Galeguista. Soamente así, coa creación dun instrumento político destas características, acadaremos os galegos as cotas de benestar que nos corresponden polas nosas tradicións, polas nosas potencialidades, e polas nosas capacidades.

Para o Partido Galeguista a IDENTIDADE é unha igualdade que, independentemente do valor das variábeis que conteña a súa formulación, pode verificase sempre. Xa que logo, cando os Galegos falamos de “sinais de identidade” exteriorizamos unha reflexión, tanto semántica como social, que reflexa unha realidade absolutamente tanxible: o conxunto de sentimentos subxectivos, dereitos históricos  e accións comúns que derivan na idea de pertenza  a unha colectividade coa que nos identificamos e, tamén,  a unha contorna na que queremos participar en pé de igualdade.

Como cidadáns da Galicia a nosa IDENTIDADE NATURAL, por dereitos lexítimos, é a de Galegos; a ela nos debemos e con ela temos compromisos persoais e xeracionais, que están por riba de calquera circunstancia puntual ou do período da historia no que nos toque vivir. Desde esa concepción temos o dereito de traballar, con accións tanto sociopolíticas como culturais ou empresariais, para facer efectivos ós instrumentos e institucións que doten a Galicia de poder executivo e administrativo indiscutiblemente propio; exactamente o mesmo dereito que nos lexitima para constituírnos en axentes activos, desde perspectivas de solidariedade e harmonización renovadora, no deseño do marco, que actualmente está vixente, das contornas inmediatas conformadas por España e a Unidade Europea.

O Partido Galeguista considera que é imprescindible aceptar que a UNIDADE EN DIFERENCIA é un concepto sociopolítico moito máis acorde coa realidade actual europea e do Estado Español xa que, como queira que esas “diferencias” consisten en sentimentos de identidade subxectivos, é totalmente imposible que se impoñan outros conceptos contra vontade e, a medio ou a longo prazo, calquera imposición remata en situacións de confrontacións innecesarias. Xa que logo entendemos necesario pechar de xeito substancial a etapa chamada “transición”, reestructurando, revisando e actualizando o que sexa necesario para optimizar e darlles sentido tanto as institucións como as realidades políticas das que xorden os distintos marcos constitucionais e estatutarios, na procura dun nivel de representatividade e actuación estatal e internacional que sexa o reflexo da cohesión interna xerada por un modelo de estado con poderes compartidos e delegados, baseado no diálogo, na convivencia pacífica, na solidariedade e no respecto ás respectivas capacidades executivas e administrativas dos diferentes territorios e nacionalidades que libremente deciden constituílo. Na práctica, os Galeguistas pensamos que é necesaria unha importantísima e urxente revisión dos conceptos que tradicionalmente veñen constituíndo a teoría e a praxe política, tanto nas formacións estatais como naquelas que abandeiran a defensa dos dereitos de cada territorio; ámbalas dúas opcións deben asumir un rol estadista equilibrado e solidario xa que non é de recibo que se instale unha crise permanente de competencias entre o estado e as nacionalidades ou os territorios autónomos porque, sen xénero algún de dúbidas, ese clima de confrontación impide que haxa garantías de poder executivo real para uns e outros no futuro.

O Partido Galeguista está preparado para asumir os mesmos retos de modernización da teoría e da praxe política que, desde o trinta e un, ven impulsando; é tempo de asumilo reto e a tarefa de pór sobre a mesa un perfil ideolóxico e unha filosofía política eficaz e aplicable, que combine a acción territorial co sentido estadista necesario para afrontalos tempos que nos toca vivir.

Constituímos pois un instrumento para a afirmación nacional de Galicia, para a defensa da súa identidade, e para afondar no dereito histórico ó autogoberno, polo que definímo-la nosa organización coma a opción política galeguista e dos galeguistas, é dicir: nacionalista, democrática, progresista, europeísta –traballaremos por unha Constitución Europea que respecte os dereitos historicamente lexítimos dos distintos territorios e Estados-, que asume como reto político amosar capacidade de diálogo coas demais forzas políticas e sociais  e manter unha exemplar práctica de política de proximidade cos cidadáns e axentes sociais,  e que recolle os valores humanistas de tradición occidental cunha clara aposta polas liberdades civís.

En definitiva, as finalidades denantes descritas, que se poderían resumir como o devezo por realizarmos un amor infinito por Galiza, son a razón de ser da opción política do PG. Unha opción que, investida do máximo grao de tolerancia, actuará cun exquisito respecto as ideas dos demais, mesmo coa práctica política da maior concordia posíbel, exercitará o afondamento na democracia, na liberdade, na xustiza, na solidariedade, e na defensa dos dereitos humanos, ata que consigamos unha Galicia na que tódalas súas mulleres e tódolos seus homes perciban que poden aspirar, con plena liberdade, a construír un proxecto de felicidade individual e colectivo.